काठमाडौं। बजेट भाषण गर्ने दिन नजिकिँदै गर्दा अर्थमन्त्री प्रकाशशरण महतले चलाखीपूर्ण ढंगले भेटघाट पातलो बनाएका छन् । मन्त्री महतले तत्कालिन अर्थमन्त्री जनार्दन शर्माको पालाको घटनाबाट पाठ सिक्दै भेट्नुपर्ने मानिसहरुसँग मन्त्रालयमा नभएर बाहिर भेट्न थालेका छन् ।
वर्षेनी बजेटको मुखमा व्यस्त रहने अर्थ मन्त्रालय यस पटक भने सुनसान प्राय देखिन्छ। विगतका बर्षहरुमा बजेटअघि मन्त्रीलाई भेट्ने नेता, व्यवसायीदेखि स्वार्थ समूहसम्मको भीड नै लाग्ने गर्थ्यो ।
अहिले भने अर्थमन्त्रीले बजेटलाई लक्षित गरेर नियुक्त गरेका सल्लाहकार र मन्त्रालयका कर्मचारी अन्य व्यक्ति भेटिदैनन। मन्त्रालयमा कर्मचारीलाई भेटघाटमा पनि कडाई गरिएको छ । मन्त्रालयको गेटबाट प्रवेश गर्दा पनि टेलिफोनबाट यकिन गर्नुपर्ने व्यवस्था गरिएको छ ।
बजेटको आय व्ययको हिसाब सकेर यतिबेला रातो किताब छपाईका लागि प्रेसमा पठाउन सुरु गरिएको छ । अब बजेटको महत्वपूर्ण विषय राजश्वका दर सम्बन्धी छलफल सुरु भएको छ । कर्मचारीप्रति त्यति विश्वास नगरेर हुनसक्छ, राजश्वका दरहरु निर्धारणमा एकलरुपमा निर्णय गर्न चाहेका छन् ।
राजश्व प्रणालीमा सुधारको कुरा गर्दै आएका मन्त्री महतले कस्तो सुधार गर्न खोजेका हुन् ? बजेट टिमकै अर्थ मन्त्रालयका कर्मचारीलाई समेत खुलाएका छैनन् । उनले मन्त्रालयमा राजस्व छलफलका लागि भन्सार विभागबाट सेवन्तक पोख्रेल, आन्तरिक राजस्व विभागबाट महानिर्देशक दीर्घराज मैनाली, राजस्व सचिव रामप्रसाद घिमिरे लगायत मन्त्रालयको टिम रहेको छ ।
यद्यपी सचिव घिमिरे राजस्वसम्बन्धी ज्ञान भएका कर्मचारी होइनन् । उनीलाई बजेटको २५ दिनअघि मात्रै मन्त्रीको योजना अनुसारको कार्यादेश स्वीकृत गराएर मन्त्रालय थमौति गरिएको हो। कार्यादेश स्वीकृत नगरेका सचिव तोयम रायलाई भने उनले प्राविधिक कारण पर्यो भन्दै सरुवा गरेका थिए ।
